សម្ដេចតេជោ ហ៊ុន សែន អះអាងថា កម្ពុជាដើរយឺតជាងកូរ៉េខាងត្បូង ដោយសារកំហុសថ្នាក់ដឹកនាំសម្រេចចិត្ដធ្វើរដ្ឋប្រហារ
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអះអាងថា កាលពីសម័យមុន កម្ពុជាបានដើរលឿនជាងប្រទេសកូរ៉េខាងត្បូងប៉ុន្តែដោយសារថ្នាក់ដឹកនាំសម្រេចធ្វើរដ្ឋប្រហារទើបធ្វើឱ្យកម្ពុជាមានការអភិវឌ្ឍដើរយឺតជាងកូរ៉េខាងត្បូង នាពេលបច្ចុប្បន្ននេះ។ ការអះអាងរបស់សម្ដេចតេជោនាយករដ្ឋមន្រ្ដីនេះ ក្នុងពិធីប្រគល់សញ្ញាបត្រដល់និស្សិតបច្ចេកវិទ្យា និងគរុនិស្សិតបច្ចេកទេស ជ័យលាភីនៃវិទ្យាស្ថានជាតិបណ្តុះបណ្តាលបច្ចេកទេស (NTTI) សរុប ចំនួន ៥ ៤៥០ នាក់ ដែលធ្វើឡើងនៅមណ្ឌលសន្និបាត និងពិព័រណ៍អន្តរជាតិជ្រោយចង្វារ នាព្រឹកថ្ងៃទី២៧ ខែកុម្ភៈ ឆ្នាំ២០២៣។
សម្ដេចតេជោ ហ៊ុន សែន បានគូសបញ្ជាក់ថា៖ «កាគិតគូរផ្នែកបច្ចេក នៅក្នុងប្រទេសកម្ពុជាមិនមែនជានៅក្នុងពេលក្រោយនេះទេ គឺមានតាំងពីសម័យដឹកនាំរបស់ព្រះបរតនកោដ្ឋ សីហនុ មកម៉្លេះ ពោលគឺនៅក្នុងទសវត្សរ៍៥០ បានបង្កើតបច្ចេកវិទ្យា គឺវិទ្យាស្ថានបច្ចេកវិទ្យាកម្ពុជា សព្វថ្ងៃនេះរួចហើយ ហើយពេលនោះមានឈ្មោះវិទ្យាស្ថានព្រះកុសមៈ ដែលសំដៅដល់ការបណ្តុះបណ្តាលផ្នែកបច្ចេកទេសនេះឯង»។ សម្តេចតេជោឱ្យដឹងថា តាមរយៈឯកសារវីដេអូនានា អ្នកបច្ចេកទេសក៏មានការកើនឡើងនៅក្នុងដំណាក់នោះ ក៏ប៉ុន្តែសង្គ្រាមបានបំផ្លាញនូវការរីកលូតលាស់ខាងបច្ចេកទេស រហូត ដល់របបប៉ុលពត បានបំផ្លាញខ្ទេចតែម្តង។
សម្តេចតេជោគូសបញ្ជាក់ថា៖ «ចំណុចនេះ យើងចោទសួរថា តើបើសិនប្រទេស កម្ពុជាយើងមិនកើតសង្គ្រាមនៅឆ្នាំ១៩៧០ សួរថាតើប្រទេសយើងបានដើរដល់ណាហើយ។ នៅក្នុងពេលនោះកម្ពុជាមានប្រាក់ចំណូលជាង២០០ដុល្លារ ក្នុងមួយនាក់ ក្នុងពេលដែល កូរ៉េខាងត្បូង មានតែ១៧៨ដុល្លារទេ។ ដូច្នេះ កម្ពុជាលឿនជាងកូរ៉េខាងត្បូងទៀត ប៉ុន្តែឥឡូវនេះ កូរ៉េខាងត្បូង គេដើរលឿនទៅឆ្ងាយជាងយើងឆ្ងាយទៅហើយ ឯងយើងនៅក្រោយ»។
សម្ដេចតេជោសង្កត់ធ្ងន់ថា ចំណុចដែលកម្ពុជាដើរយឺតជាងប្រទេស កូរ៉េខាងត្បូង មកដល់សព្វថ្ងៃនេះ គឺចំណុចនេះដោយសារកំហុសមេដឹកនាំសម្រេចចិត្ត ធ្វើរដ្ឋប្រហារ បន្ទាប់ទៅគឺរបប ប៉ុល ពត ។ សម្ដេចតេជោបានថ្លែងបញ្ជាក់ថា៖ «ឥឡូវវិល មកវិញគឺក្រោយ ថ្ងៃរំដោះយើងបានរៀបចំ ឱ្យមានការបណ្តុះបណ្តាល ក៏ប៉ុន្តែការបណ្តុះ បណ្តាលរបស់យើងទៅមុខមិនរួច ដោយសារទីផ្សារ» ។
សម្តេចតេជោនាយករដ្ឋមន្ត្រីបានលើកឡើងថា កាលពីឆ្នាំ១៩៩៦ កម្ពុជាក៏មានការបណ្តុះបណ្តាលបច្ចេកទេស ហើយក៏មានការបណ្តុះបណ្តាលផងដែរ។សម្តេចតេជោបានបន្ដថា ការបណ្តុះបណ្តាលរបស់ក្រសួងការងារ និងបណ្តុះបណ្តាលវិជ្ជាជីវៈគឺធ្វើនៅពេលសម្តេចក្រុមព្រះ នរោត្ដម រណឫទ្ធិ ធ្វើជាប្រធានរដ្ឋសភា ហើយក៏ចំថ្ងៃការរៀបការកូនសម្តេចផងដែរ។
សម្តេចតេជោបានរម្លឹកផងដែរថា កាលពីដើមសាលាបណ្តុះបណ្តាលវិជ្ជាជីវៈនៅក្នុងក្រសួងអប់រំយុវជន និងកីឡា ប៉ុន្តែដោយសារក្រសួងអប់រំមានការពិបាកគ្របដណ្តប់នៅផ្នែកបណ្តុះបណ្តាលវិជ្ជាជីវៈ ។
Post a Comment